‘Jail a Bail’ fondswerwing ‘n reuse sukses!

Thabazimbi – In ‘n innoverende poging om fondse in te samel, het Laerskool Thabazimbi se Graad 7 groep en leiers ‘n unieke fondsinsamelingsprojek, bekend as ‘Jail a Bail’, op Woensdag 14 Februarie 2024, van stapel gestuur. Die projek is ontwerp om geld in te samel vir die Graad 7 afskeid, ‘n kerkdiens, en verskeie ander spesiale geleenthede wat deur die jaar vir hulle, in hul finale jaar van laerskool, aangebied word. Die fondse sal ook bydra tot die Graad 7 leierfonds.

Die konsep agter ‘Jail a Bail’ was eenvoudig maar effektief: eienaars of verteenwoordigers van plaaslike besighede is genomineer om vir twee ure, van 09:00 tot 11:00, in ‘n simboliese “tronk” te sit. Gedurende hierdie tydperk kon ander besighede of individue hulle “uit bail” deur ‘n finansiële bydrae te maak. Die gemeenskapsbetrokkenheid en entoesiasme rondom die projek was oorweldigend, en het bygedra tot die groot sukses daarvan.

Die gemeenskap se ondersteuning was merkwaardig, met aansienlike bydraes wat ingesamel is. Die skoolgemeenskap het hul dank uitgespreek teenoor al die deelnemende besighede en individue wat ‘n handjie bygesit het om die dag ‘n sukses te maak. 

Jeremy Fernandes, eienaar van Foodzone and Ultra Liquors Thabazimbi, het sy ervaring gedeel: “Ons probeer altyd om betrokke te raak by fondsinsamelingsprojekte vir ‘n goeie doel. Laerskool Thabazimbi se projek was nie net groot pret nie, maar dit was ook ‘n absolute plesier om terug te gee aan die gemeenskap.”

Die ‘Jail a Bail’-projek het nie net fondse ingesamel nie, maar het ook die gemeenskap nader aan mekaar gebring, en bewys dat deur saam te staan, ons ‘n merkbare verskil in die lewens van ons jeug kan maak.