Nuwe rekords en merkwaardige gees!

Thabazimbi – Hoërskool Frikkie Meyer het op Vrydag, 26 Januarie 2024, hul jaarlikse atletiekinterhuis vol energie en gees aangebied. Die skool se leerders is opgedeel in drie spanne – wit, blou, en rooi – gebaseer op hul vanne, waar hulle nie net in atletiese prestasies meegeding het nie, maar ook in spangees. Die Wit span het voor gelei met 1,326 punte, gevolg deur die Blou span met 1,095 punte, en die Rooi span het 1,029 punte behaal.

Die dag was egter nie net oor gees nie, maar het ook geskiedkundige oomblikke beleef met nuwe skoolrekords wat opgestel is.

Keanu Visser het die hoogspringrekord gebreek met ‘n sprong van 1.87 meter, effens beter as die vorige rekord van 1.86 meter. Micka Rohrs het twee keer geskitter deur die gewigstootrekord te verbeter na 11.12 meter van 10.84 meter en die diskusrekord na 33.67 meter, wat beide die baan- en interhuisrekords oorskry het. HJ Koekemoer het die 110m hekkies in 14.97 sekondes voltooi, ‘n breukdeel vinniger as die vorige rekord van 15.00 sekondes. Lize-Marie Erasmus het ook ‘n nuwe spiesgooirekord opgestel met ‘n afstand van 35.91 meter, wat die vorige rekord van 35.14 meter oortref.

Photo: Die Rooi span skitter met gees en entoesiasme!