As ma of pa nie ‘n borg is nie, kry seun nie ‘n plek in die span nie [skrywe aan die redakteur]

Thabazimbi – My seun, ‘n ywerige en talentvolle rugbyspeler, is onlangs oorgesien vir die spankeuse, ‘n besluit wat my en hom diep ontstel het. Die plaaslike skoolrugby-span se seleksieproses laat my twee keer dink... 

Ten spyte van sy merkwaardige fiksheid en toewyding, is my seun nie gekies na slegs twee oefensessies nie, sonder dat regverdige en deeglike proewe plaasgevind het. Dit is kommerwekkend dat die seleksie blykbaar beïnvloed word deur ekonomiese faktore eerder as werklike meriete. Dit is algemeen bekend dat diegene met ‘finansieel bevoordeelde’ ouers ‘n voorkeur geniet in die keuringsproses.

Ek is ‘n ywerige ondersteuner van alle sportaktiwiteite in ons dorp, maar my beursie het dit nie te breed nie en laat my nie toe om ‘n borg vir die span te wees nie. Die idee dat ‘n gebrek aan ekonomiese bydrae ‘n speler se kanse op insluiting in die span kan benadeel, is nie net onregverdig nie, maar dit staan ook in stryd met die ware gees van sportmanskap.

Ek glo vas dat elke speler, ongeag hul agtergrond, ‘n gelyke kans verdien om op hul meriete beoordeel te word. My seun sal hieruit leer om nog harder te werk vir sy doelwitte, maar dit is ‘n les wat hy nie behoort te leer as gevolg van onbillike praktyke nie.

Ek hoop dat hierdie brief die nodige aandag sal trek en tot ‘n meer regverdige en deursigtige seleksieproses sal lei.

#PlatsakPappa